നമ്മുടെ ട്രെയിൻ യാത്ര സുരക്ഷിതമാണോ?

മറക്കാനാവാത്ത ഒരു പാട് അനുഭവങ്ങൾ സമ്മാനിക്കുന്നത് നമ്മുടെ യാത്രകളിൽ നിന്നാവാം. എതൊരു യാത്രയിലും നാം പൂർണ്ണ സുരക്ഷിതരായിരിക്കില്ല. അമിതമായ ആഘോഷങ്ങളിൽ മുഴുകാതെ പുത്തൻ കാഴ്ചകൾ കണ്ട് യാത്രകളിൽ ആനന്ദം കണ്ടെത്തുക.
ആഴ്ചയിൽ രണ്ട് തവണ ട്രെയിനിൽ യാത്ര ചെയ്യുന്ന  ഞാൻ സ്ഥിരം കാണുന്ന കാഴ്ചയാണ് ട്രെയിനിന്റെ ഡോറിൽ ഇരിക്കുന്ന യാത്രക്കാർ. ഈ പ്രവണത വളരെ അപകടം പിടിച്ച ഒന്നാണ്. യാത്രക്കാരിൽ യുവാക്കളാണ് അതികവും ഇത്തരത്തിൽ ഇരിക്കാറ്. റെയിൽവെ പോലീസിനെ കണ്ടാൽ ഇവർ അവിടെനിന്നും മാറിനിൽക്കും. നിയമപരമായി തെറ്റായത് കൊണ്ടായിരിക്കാം. വേണ്ടരീതിയിലുള്ള പരിശോധന ഇല്ലാത്തത് കൊണ്ട് തന്നെയാവാം ഇത്തരക്കാർ ജീവന് ഭീഷണിയാകുന്ന ഇത്തരം പ്രവണത തുടരുന്നത്. ഈ കാര്യത്തിൽ പെൺകുട്ടികളും ഒട്ടും പുറകിലല്ല എന്ന സത്യവും നമുക്ക് കാണാൻ കഴിയും.
ട്രെയിൻ കടന്ന് പോകുന്ന  പാത എന്റെ നാട്ടിലുമുണ്ട്. ട്രെയിനിൽ നിന്നും ഒരാൾ വീണു എന്ന വാർത്തകൾ എന്റെ നാട്ടിൽനിന്നും ഞാൻ കേട്ടിട്ടുണ്ട്. വർഷങ്ങൾക്ക് മുമ്പ് ഞാനും സുഹുത്തുക്കളും കൂടി റെയിൽവെ പാതയുടെ തൊട്ടടുത്ത പാടത്ത് കളിക്കുമ്പോൾ ആ വഴിപോയ ട്രെയിനിൽനിന്നും ഒരാൾ  വീഴുന്നത് ഞാൻ കണ്ടു എന്ന് കളിക്കളത്തിൽ നിന്നും ആരോ പറഞ്ഞു. ഉടൻ തന്നെ ഞങ്ങൾ ഓടി എത്തിയപ്പോൾ കണ്ട കാഴ്ച എന്നെ വല്ലാതെ ഭയപ്പെടുത്തി. തൊട്ടടുത്ത റെയിൽവെ ഗേറ്റ്മാനോട് പറയുകയും നാട്ടിലെ നല്ലവരായ യുവാക്കൾ വരുകയും ചെയ്തതോടെ വീണയാളെ ഹോസ്പിറ്റലിലെത്തിച്ചു.
നാം ഓരോരുത്തരും വീട്ടിൽ നിന്നിറങ്ങി കഴിഞ്ഞാൽ വീട്ടുകാരെകുറിച്ച് ചിന്തിക്കുന്നുണ്ടോ?
നിങ്ങൾ വീട്ടിൽ തിരിച്ചെത്താൻ കുറച്ച് വൈകിയാൽ അവർ നിങ്ങളെ വിളിക്കുന്നു... അവരുടെ സ്നേഹവും പ്രാർത്ഥനയും കണ്ടില്ലെന്ന് നടിക്കരുത്... നാളെ നമ്മളും ഇത് പോലെ പലരേയും സ്നേഹത്തോടെ കാത്തിരിക്കും..... ഓർക്കുക...